Ош шаарынын мэри Жанарбек Акаев «Жаштардын креативдүү хабына» барып, борбордун ишмердүүлүгү жана түзүлгөн шарттар менен жеринен таанышты. Хабдын жамааты менен жолугушууда мэр жаштардын демилгелерин колдоо максатында 100 миң сом акчалай сыйлык тапшырды. Ошондой эле бул мейкиндикти мындан ары да өнүктүрүп, жаштар үчүн жаңы мүмкүнчүлүктөрдү түзүү маанилүү экенин белгиледи. «Биз жаштар билим алып, чыгармачылык менен алектенип, өз идеясын ишке ашыруусу үчүн бардык шарттарды түзөбүз. Азыр дүйнө тездик менен өзгөрүп жатат. Жасалма интеллект, санариптик технологиялар, жаңы кесиптер жана чыгармачыл индустриялар заман талабы болуп калды. Ош шаарынын жаштары дагы ушул өзгөрүүлөрдөн артта калбашы керек», — деди Жанарбек Акаев. «Жаштардын креативдүү хабы» — жаштар үчүн заманбап көп функционалдуу борбор. Бул жерде иштөө, билим алуу, жолугушууларды өткөрүү жана эс алуу үчүн бардык мүмкүнчүлүктөр каралган. Шаар мэриясы аталган борбор жайгашкан Молдо Нияз көчөсүн толук оңдоп, асфальт төшөп берди. Эми жаштар үчүн хабга жетүү дагы ыңгайлуу жана жагымдуу болот.Буга чейин дал ушул сыяктуу эле “Жаштар борбору” колдонууга берилген. Үч кабаттуу имаратта тил үйрөтүү, шахмат, кулинария курстары, лидерлик боюнча окуутуулар, ошондой эле заманбап конференц-залдар камтылган.
