Ош шаарында 23-сентябрь – Кыргыз Республикасынын мамлекеттик тил күнүнө карата салтанаттуу иш-чара өттү.
Майрамдык иш-чара Ош шаарынын мэриясынын, Ош шаардык маданият жана жаштар башкармалыгынын уюштуруусунда Бабур атындагы театрда өткөрүлдү.
Ага Ош шаарынын мэринин орун басары Масуда Айдарбекова, Ош шаардык кеңешинин депутаты Ниязбек Нурбаев, маданият кызматкерлери, чыгармачыл инсандар жана шаар тургундары катышышты.
Иш-чаранын жүрүшүндө кыргыз тилинин коомдогу орду, анын өнүгүүсү жана кийинки муунга өткөрүп берүү маанилүүлүгү белгиленди. Манасчылар, төкмө акындар, белгилүү эстрада ырчылары, бий жана музыкалык топтор өнөрлөрүн тартуулашты.
Ошондой эле мамлекеттик тилди өнүктүрүү боюнча сынактын жеңүүчүлөрүнө баалуу белектер жана акчалай сыйлыктар тапшырылды.
