Бүгүн 12-сентябрда, Ош шаарынын мэринин орун басары Эрнис Толтоевдин төрагалыгы алдында Европа реконструкциялоо жана өнүктүрүү банкынын (ЕРӨБ) “Жашыл шаар” программасынын алкагында жумушчу топтун отуруму өттү.
Жыйында Ош шаарынын экологиялык абалына жүргүзүлгөн баштапкы баалоонун жыйынтыктары каралып, негизги экологиялык көйгөйлөр жана аларды чечүүнүн артыкчылыктуу багыттары талкууланды. Ошондой эле шаардын туруктуу өнүгүүсүн камсыз кылуу үчүн натыйжалуу жана узак мөөнөттүү чараларды ишке ашыруунун маанилүүлүгү тууралуу кеп болду.
Талкуунун негизги багыттары:
• Абанын сапатын жакшыртуу жана шаардагы жашыл аймактарды кеңейтүү;
• Имараттардын энергетикалык натыйжалуулугун жогорулатуу жана турак жай секторун модернизациялоо;
• Суу менен камсыздоо жана саркынды сууларды тазалоо системаларын жаңылоо;
• Коомдук транспортту өнүктүрүү жана катуу тиричилик калдыктарын натыйжалуу башкаруу;
• Климаттык тобокелдиктерди азайтуу жана суу ташкындарынын алдын алуу чараларын күчөтүү.
Ош шаарынын мэринин орун басары Эрнис Толтоев “Жашыл шаар” иш-аракеттер планы жөн гана документ бойдон калбастан, шаарды өнүктүрүүнүн реалдуу багыттарын аныктаган, конкреттүү иш-чараларга, каржылоо булактарына жана инвестициялык долбоорлорго негизделген практикалык жол картасы болушу керектигин баса белгиледи.
Учурда ЕРӨБ өкүлдөрү жана эксперттер менен биргеликте бул багытта иш алып баруу улантылууда. Алдыдагы күндөрү энергетика, имараттар, суу ресурстары жана транспорт тармактары боюнча өзүнчө тематикалык талкуулар өткөрүлүп, тиешелүү сунуштар иштелип чыгат.
