Бүгүн шаардагы балдардын бош убактысын көңүлдүү өткөрүүсү үчүн эки заманбап объекти колдонууга берилди. Бири № 40 “Наристе” мектепке чейинки билим берүү уюмунун аймагынан орун алса, экинчиси Р. Абдыкадыров көчөсүндөгү № 195 көп кабаттуу үйдүн короосунда жайгашкан.
Жаңы аянтчаларда балдардын ар тараптуу эс алуусуна шарт түзүлүп, жаш өзгөчөлүктөрүнө ылайык түрдүү оюн шаймандары орнотулуп, жаракат алуунун алдын алуу максатында атайын жумшак каптамалар жаткырылды. Ошондой эле жөө басуучу тилкелер төшөлүп, заманбап отургучтар коюлду. Аймак көрктөндүрүлүп, жөө жүрүүчү тилкелер уюштурулду.
Ош шаарынын мэри Жанарбек Акаев жаңы объектилерге барып, аткарылган иштер жана түзүлгөн шарттар менен жеринен таанышты. Ошондой эле жергиликтүү тургундар менен баарлашып, пикир алышты.
Шаар башчысы келерки жылы балдар үчүн ыңгайлуу шарттарды түзүүгө өзгөчө көңүл буруларын белгиледи. Айрыкча көп кабаттуу үйлөрдүн алдында заманбап жана коопсуз балдар аянтчаларын куруу жана жаңылоо иштери максаттуу түрдө күчөтүлөрүн билдирди.
