Ош шаарынын мэри Бакытбек Жетигеновдун тапшырмасына ылайык, шаар ичиндеги жол тыгындарын жоюу максатында Ленин көчөсүнүн Загородный көчөсүнөн Курманжан-Датка көчөсүнө чейинки 1,7 чакырым аралыгындагы жолду капиталдык оңдоп-түзөө жумуштары башталды.
Аталган жол Ош шаарынын мэриясынын балансына өткөрүлүп берилди. Бул жол бир тараптуу унаа кыймылы үчүн Ош автобекетине туташтырылат. Учурда мыйзамсыз жана убактылуу курулган объектилерди алып салуу, жолду кеңейтүү жумуштары кызуу жүрүүдө.
Ошондой эле жеринде жолго асфальт төшөө, жол сызыктарын чийүү, ирригациялык тармактарды оңдоо, тротуарларды куруу, жарыктандыруу боюнча даярдык иштери жүрүп жатат. Аталган тилкедеги коммуналдык тутумдардын ишин иретке келтирүү максатында Ош шаарынын баардык тиешелүү кызматтары да тартылган.
Калаа башчы Бакытбек Жетигенов жумуштарды сапаттуу жана белгиленген мөөнөттө бүткөрүү тапшырмасын берген.
Белгилей кетсек, Ленин көчөсүнүн Мамажан менен Загородный көчөсүнө чейинки бир чакырым аралыгындагы жолго буга чейин асфальт төшөлүп, пайдаланууга берилген.
