Бүгүн, Ош шаарынын мэриясында жарандардын кайрылуусуна ылайык, КРнын Эмгек, социалдык камсыздоо жана миграция министрлигине караштуу Медициналык-социалдык экспертизалоо комиссияларынын ишмердүүлүгү боюнча Ош шаарынын мэриясынын аппараттык кеңешмеси болуп өттү.
Жыйынды Ош шаарынын мэринин орун басары Нурбек Кадыров алып барып, ага Ош шаардык үй-бүлөлүк медицина борборунун филиалдарынын, Ош шаардык социалдык фондунун, Эмгек, социалдык камсыздоо жана миграция башкармалыгынын, Ош шаардык реабилитациялык борборунун жана Ош шаардык оорукананын жетекчилери катышты.
Жыйындын жүрүшүндө, Ош шаарында 4 аймактык медициналык-социалдык эксперттик комиссия, Республикалык медициналык-социалдык экспертиза борбору тарабынан бекитилген иш-мерчем боюнча алты ай ичинде аткарылган иштердин жыйынтыгы боюнча маалыматтар берилди.
Ошондой эле, жыйындын алкагында медициналык мекемелерде комиссиянын ишин уюштуруу, өз учурунда сапаттуу аткаруу, «Мамлекеттик тил жөнүндө» мыйзамынын негизинде, иш кагаздарды жүргүзүү боюнча маселе көтөрүлүп, аларды типтүү нускаманын талаптарына ылайык, коррупцияны алдын алуу максатында электрондук тутумуна киргизүү жана жүгүртүү менен бирге бул боюнча окутууларды өткөрүү сунушталып, жаралган кемчилдиктерди үч айдын ичинде жоюу талабы коюлду.
