Ош шаарында Г. Давыдов көчөсүндө (Шейит-Дөбө аймагы) жаңыдан курулган аллеянын ачылышы болуп өттү. Иш-чарага Ош шаарынын мэри Жеңишбек Токторбаев, жергиликтүү тургундар катышып, аллеяны бирге көрүп чыгышты.

Жаңы аллея шаар тургундары үчүн ыңгайлуу шарттары менен заманбап талаптарга ылайык курулган. Буга чейин Ош шаарынын мэри таңкы рейддин алкагында бул аймакты кыдырып, мал кармап, сарай салып алган жашыл аймактын орду каралбай, иреттелбей, таштанды басып жаткандыктан, бак-дарактарды бутап, айланасын жашылдандырып, мал сарайды алып салып, жашоочулар үчүн эс алуу жайын куруу тапшырмасын берген.

Ага ылайык, иретке келтирүү иштери жүргүзүлүп, аллеяга жаңы көчөттөрдү отургузуу менен бирге сугат системасы жана түнкү жарыктандыруу орнотулган. Айланасы тосулуп, жөө жүргүнчүлөр үчүн тротуар төшөлгөн.

Шаар мэри жаңы жашыл аймак жашоочулар үчүн үй-бүлөлүк сейилдөө жайы катары кызмат кылып, мындан ары да көрктөндүрүп, таштанды жайына айлантпай таза кармоого чакырды.