Бүгүн, 28-августта Ош шаарындагы жаңы муниципалдык базарда Салык кызматынын төрагасы Алмамбет Шыкмаматов, Президенттин Иш башкаруучусу Каныбек Туманбаев жана мэр Жеңишбек Токторбаевдин катышуусунда акциздик маркаларды көзөмөлдөө боюнча рейд өткөрүлдү. Рейд учурунда алкоголдук жана кант камтыган продукциялардагы акциздик маркалардын аныктыгы текшерилип, жасалма маркаларды аныктоого өзгөчө көңүл бурулду. Акциздик продукциялар салыктык түшүүлөрдү камсыздап, калкты сапатсыз товарлардан коргоодо маанилүү экени белгиленди. Текшерүүнүн жыйынтыгында айрым соодагерлерде акциздик маркаларсыз продукциялар аныкталып, мыйзам бузгандарга карата тиешелүү чараларды көрүү тапшырылды. Ошондой эле Алмамбет Шыкмаматов көмүскө экономиканы кыскартуу максатында мэрге пилоттук долбоор сунуштады. Ага ылайык, шаар бийлигине салыктын чогулушун көзөмөлдөө укугун берип, түшкөн салыктын 50%ын жергиликтүү бюджетке калтыруу демилгеси көтөрүлдү.
