Бүгүн, 27-октябрда Ош шаардык муниципалдык автоунаа ишканасынын оңдоо-түзөөдөн өткөрүлгөн имараты пайдаланууга берилди. Иш-чарага мэр Жеңишбек Токторбаев, шаардык кеңештин төрагасы Болот Баетов жана мекеменин жамааты катышты.
Бул имарат курулгандан бери капиталдык ремонттон өткөрүлгөн эмес. Жыл башында Жеңишбек Токторбаев ишкананын абалы менен таанышып, быйылкы жылы оңдоп, кызматкерлерге шарт түзүүнү тапшырган.
Ага ылайык ишкананын 3 кабаттан турган имаратынын фасады, бөлмөлөрү толугу менен капиталдык ремонттон өткөрүлүп, 1 500 метр квадрат болгон аянты асфальтталды. Ошондой эле таза суу насостору жаңыланып, аймагы көрктөндүрүлдү.
Белгилей кетсек, аталган мекемеде 360 кызматкер эмгектенет. Автобус, троллейбустардын жалпы саны 181. Бүгүнкү күндө ишкана 2 троллейбустук жана 9 автобустук каттамдарды тейлейт.
