Ош мамлекеттик университетинде аталган окуу жайдын 85 жылдык маарекесине карата Ош шаарынын мэриясы, Маданият, маалымат, спорт жана жаштар саясаты министрлиги, аталган окуу жай менен биргеликте “Жаштар өлкөнүн туруктуу өнүгүүсүнө карай” аталышындагы республикалык форум өткөрүлдү.

Форумга Ош шаарынын мэринин орун басары Сонунбек Жунусбаев, Маданият, маалымат, спорт жана жаштар саясаты министрлигинин жаштар саясаты башкармалыгынын башчысы Аскар Шайкидинов, мамлекеттик мекемелердин өкүлдөрү, Ош, Жалал-Абад, Баткен облустарынан келген студенттер катышты.

Иш-чаранын алкагында «ОшМУ сүрөтчүлөрдүн көзү менен» аттуу сүрөтчүлөрдүн көргөзмөсү жана ОшМУнун жаштарынын жетишкендиктеринин парады уюштурулду.

Форум креативдүү жаштардын идеяларын бириктирүү, ыктыярчылыкка тартуу, жаштарга тыюу салынган диний-экстремисттик уюмдардын ишмердүүлүгүнө жана коомдогу зордук-зомбулукка байланыштуу коопсуздук маселелерин талкулоо, киберкоопсуздук боюнча маалымат берүү, окуу жайдын ишмердүүлүгү менен тааныштыруу максатында өттү.