Бүгүн, Ош шаарынын мэриясында көп балалуу энелерге “Баатыр эне” орденин жана “Эне даңкы” медалдарын тапшыруу аземи болуп өттү.
Аземге Ош шаарынын мэринин орун басары Нурбек Кадыров катышып, коомдун өнүгүшүнө жана келечек муундун калыптанышына өзгөчө салым кошкон, наам ээлерин алган жогорку сыйлыктары менен куттуктады.
Белгилей кетсек, КР Президентинин жарлыгына ылайык, бүгүн “Баатыр эне” ордени менен 15, “Эне даңкы” медалы менен 11 эне сыйланды. Ал эми Ош шаарынын мэриясы тарабынан ар бир айымга акчалай сыйлыктар тапшырылды.
Маалымат үчүн: “Баатыр эне” наамы жети жана андан көп бала төрөгөн, балдарга бардык жактан татыктуу тарбия берген энелерге ыйгарылат. Ал эми “Эне даңкы” медалы менен алты бала төрөгөн жана аларды татыктуу тарбиялаган Кыргыз Республикасынын жарандары, ошондой эле жетим балдар жана ден соолугунун мүмкүнчүлүктөрү чектелүү балдар үчүн окуу-тарбиялоо мекемелеринде 15 жылдан ашык кынтыксыз иштеген аялдар сыйланышат. Наамды тиешелүү жобого ылайык алуу үчүн жаран катталган дареги боюнча жергиликтүү өз алдынча башкаруу органдарына кайрылса болот.
