🔸 “Жарандык коргонуунун 2024-жылга даярдык планынын” негизинде Жарандык коргонуу тутумдарынын абалын баалоо жана текшерүү талаптарына ылайык ӨКМдин Ош шаары боюнча башкармалыгы, Ош шаарынын мэриясы биргеликте 18-сентябрдан тарта 20-сентябрга чейин атайын машыгууларды өткөрүшөт.
Буга байланыштуу бүгүн, Ош шаарынын мэри Бакытбек Жетигеновдун, Өзгөчө Кырдаалдар министринин орун басары, генерал-майор Урматбек Шамыркановдун жетекчилиги астында, жарандык коргонуу кызматтарынын, мекеме-ишканалардын, муниципалдык аймактык башкармалыктардын жетекчилеринин катышуусунда Өзгөчө кырдаалдар жаралган учурда ар бир мекеменин аткара турган иш-аракеттери боюнча штабдык отурум өттү.
Андан кийин, борбордук аянтта ыкчам топтордун машыгууга болгон даярдыктары текшерилди.
Белгилей кетсек, машыгууларда жарандык коргоого кирген кызматтарга жер титирөө катталган учурларда абалды тактоо, жабыркагандарды издөө, куткаруу, жарандарды эвакуациялоо жана жайгаштыруу, алгачкы жардамдарды көрсөтүү, коммуналдык-энергетикалык, транспорттук тутумдарды калыбына келтирүү, өзгөчө кырдаал шартында өзүнүн кызмат орду боюнча милдеттерди иш жүзүндө кечиктирилгис аткаруу менен билимдерин жана көндүмдөрүн өркүндөтүүгө шарт түзүлөт.
