“Токтогул” эс алуу багындагы “Весна” жайкы кинотеатры Ош облусунун мамлекеттик мүлк фондусунун 1999-жылдагы алуу-сатуу келишиминин негизинде РИА «Азия Табак» жоопкерчилиги чектелген коомуна 180 000 сомго сатылып, анын негизинде 1999-жылы менчик укугу жөнүндөгү күбөлүгү берилген.
Андан кийин “Бакай-Банк” ААКнун Ош филиалына, бир катар жеке тараптарга сатып алуу келишиминин негизинде жер участогуна жеке менчик укугу жөнүндө мамлекеттик актылар берилген.
Бирок, Кыргыз Республикасынын Президентинин 1995-жылдагы жарлыгына ылайык, социалдык инфраструктуранын объекттери мамлекеттик жана менчикке өткөн ишканалардын балансында болсо, же менчиктештирүү процессинде пайдалануунун учурдагы тартибин сактоонун шарттарында аларга акысыз өткөрүлүп берилсе, алардын уставдык фонддогу мамлекеттик үлүштөрүнүн өлчөмдөрүнө карабастан сатууга болбойт деп көрсөтүлгөн.
Ага карабай социалдык инфраструктуранын объектиси болуп эсептелген «Весна» жайкы кинотеатры мыйзам бузуу менен жеке менчикке сатылып, менчиктештирилип кеткен.
Бул факты боюнча Финансы полициясы 2011-жылы кылмыш иш козгоп, тергөө амалдарын жүргүзгөн.
Ээси тарабынан 2015-жылы бул жагдайлар боюнча Ош облусунун прокуратурасы, Ош шаарынын мэриясы тарабынан кинотеатрдын жер тилкесин мыйзамсыз менчиктештирүү боюнча чечимдери менен келишимдерди жана бул объект боюнча жана кийинки бүтүмдөрдү жокко чыгаруу боюнча сотко доо арыздар келтирилип, соттук териштирүү иштери ушул күнгө чейин уланып, улам жылдырылып, бүтпөй келүүдө.
Ал эми бул аралыкта кинотеатрдын айлана-тегереги каралбай, таштандыга толуп, пайдаланылбай урандыга айланып бара жатат.
