Ош шаарынын мэри Жеңишбек Токторбаев бүгүн жергиликтүү бюджеттин киреше бөлүгүн көбөйтүү жана көмүскөдө иштеп жаткан ишканаларды ачыкка чыгаруу боюнча укук коргоо органдарынын, шаардык салык кызматынын жетекчилиги жана кызматкерлеринин катышуусунда кеңейтилген аппараттык кеңешме өткөрдү.
Жыйында шаар башчысы салык кызматкерлерине кайрылып, бир катар тапшырмаларды койду.
Алсак, шаар аймагында көмүскөдө иштеп жаткан ишканаларды ачыкка чыгаруу менен салык органдарына эсепке алуу.
Аны менен катар мүлк жана жер салыктарынын базаларын тактап, мүлк салыгын чогултуу, ири тойкана, ресторандардын, жеке медициналык борборлордун, курулуш компаниялардын, өндүрүш ишканалардын ээлери менен сүйлөшүүлөрдү жүргүзүп, канча жумушчу болсо, баары менен ачык эмгек келишимин түзүү менен киреше салыгын, социалдык төлөмдөрдү төлөө.
Ошондой эле, коомдук тамактануучу жайларга, соода түйүндөргө, эт сатуучу дүкөндөргө жана башка субъектилерге салыктык постторду уюштуруу тапшырылды.
