Бүгүн, Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Адылбек Касымалиевдин катышуусунда Ош шаарынын мэриясынын коллегиясы болуп өттү.

Коллегиялык жыйында Ош шаарынын мэринин орун басары Марс Исаев Ош шаарынын 2024-жылындагы социалдык-экономикалык өнүгүүсүнүн жыйынтыктары жөнүндө, анын ичинде жергиликтүү маанидеги маселелерди чечүүгө, калкты таза суу менен камсыздоого, жол инфраструктурасын жакшыртууга, социалдык жактан коргоонун сапатын көтөрүүгө, шаар аймагында катталган өзгөчө кырдаалдардын кесепеттерин жоюуга багытталган негизиги иш-аракеттер тууралуу кеңири маалымат берди.

Андан соң Ош шаарынын мэринин орун басары Замир Юсупов үстүбүздөгү жылга карата шаардын социалдык-экономикалык өнүгүүсүнө багытталган иштердин планы менен тааныштырды.

Анда белгиленгендей, административдик-аймактык реформанын алкагында шаардын аймагы 17,7 миң гектардан 39,3 миң гектарга кеңейгендигин эске алуу менен шаар калкы үчүн жашоого ыңгайлуу болгон шарттарды түзүү жана жергиликтүү маанидеги маселелерди чечүү максатында үстүбүздөгү жылы бир катар инфраструктуралык долбоорлорду ишке ашыруу каралган.

Анын ичинде:
– Мамлекеттик жеке өнөктөштүк,;
– Социалдык турак жай программасын ишке ашыруу;
– Коомдук транспорт менен тейлөөнү жакшыртуу;
– Шаар калкын үзгүлтүксүз таза суу менен камсыздоо;
– Саркынды сууларды тазалоочу станцияларын реабилатициялоо;
– Катуу тиричилик калдыктарын башкаруу системасын жакшыртуу;
– Жол инфратүзүмүн жакшыртуу;
– Социалдык объекттерди куруу;
– Саламаттык системасын өнүктүрүү пландаштырылды.

Жыйында Министрлер Кабинетинин Төрагасы өткөн жылы өлкөдөгү социалдык, экономикалык, инвестициялык жана башка тармактарда жетишилген жыйынтыктар менен бөлүштү.

Жыйындын соңунда, жыйында кабыл алынган токтом долбоорлордун негизинде протоколдук тапшырмаларды өз убагында аткаруу тапшырмасы коюлду.