Ош шаарындагы Д. Садырбаев көчөсүндө көп жылдан бери пайдаланылбай, каралбай турган имарат Ош шаардык муниципалдык автоунаа ишканасынын ыкчам башкаруусуна өткөрүлүп берилип, оңдоп түзөөдөн соң бүгүн пайдаланууга берилди.
Ишкананын имаратын ачууга Ош шаарынын мэри Жеңишбек Токторбаев, шаардык кеңештин төрагасы Болот Баетов, мекеме-ишкана жетекчилери, ишканынын кызматкерлери катышышты. Бул жер кыска аралыкта оңдоп түзөөдөн өтүп, шарт түзүлүп, айланасындагы курулуш калдыктары жана ар кандай таштандылар тазаланып, имараттын ички бөлүгү актап сырдалып, чатырын оңдоп түзөө иштери жүргүзүлгөн. Ошондой эле дарбазасы жаңыдан жасалып, мекеменин аты жазылып, иретке келтирилген.
Эске салсак ишкана жайгашкан аймак 1,5 гектар жери менен имараты жеке тараптардын колуна өтүп менчиктештирилип кеткен мүлк толук мамлекетке кайтарылып алынган. Анын алкагында Кыргыз Республикасынын Улуттук коопсуздук мамлекеттик комитетинин төрагасы Камчыбек Ташиевдин сунушу менен имарат, жер аянты менен Ош шаарынын мэриясынын муниципалдык менчигине өткөрүлүп берилген.
