Бүгүн, 5-октябрда Ош шаарынын түптөлгөн күнүнө карата Алымбек Датка муниципалдык аймактык башкармалыгындагы Ирригатор көчөсүндө жаңы курулуп бүткөрүлгөн мектептин ачылышы болуп өттү.

Иш-чарага Кыргыз Республикасынын Министрлер Кабинетинин Төрагасы – Кыргыз Республикасынын Президентинин Аппаратынын Жетекчиси Акылбек Жапаров, Ош шаарынын мэри Бакытбек Жетигенов, шаардык билим берүү тармагынын, илимий чөйрөнүн өкүлдөрү жана жергиликтүү тургундар катышты.

Эки кабаттуу жаңы мектеп 275 окуучуга ылайыкташкан. Имарат республикалык бюджеттин эсебинен заманбап талаптарга ылайык курулуп бүткөн. Мектепте окуучулар үчүн бардык зарыл болгон шарттар түзүлүп, спорт аянтчалар, откана, суу кампасы менен жабдылган.

Белгилей кетсек, имараттын курулушу 2015-жылдын декабрында башталып, каражаттын жетишсиздигинен улам убактылуу токтотулган.