Бүгүн Ош шаарынын мэри Жанарбек Акаев “Ош шаарындагы жаңы суу алуучу курулма” долбоорунун алкагында аяктаган курулуш иштери менен жеринен таанышып, объекттин 1-линиясын расмий түрдө ишке киргизди.
Шаар башчысы Төлөйкөн аймактык башкармалыгынын Данги тилкесине барып, аткарылган жумуштардын сапатын текшерди. Анын жүрүшүндө тиешелүү адистер аткарылган иштердин жыйынтыгы жана экинчи этаптын пландары тууралуу маалымат беришти.
Аталган долбоор калкка көрсөтүлүүчү кызматтардын сапатын жогорулатууга, өзгөчө нөшөрлүү жаан-чачын учурунда Ак-Буура дарыясынын ылайкалануусунан улам келип чыккан суу тартыштыгын түп-тамырынан чечүүгө багытталган.
Долбоор боюнча негизги көрсөткүчтөр:
– Ак-Буура дарыясынын Данги тилкесинде жаңы суу алуучу курулма курулуп, Төлөйкөн айылындагы дамбага чейин диаметри 1000 мм болгон эки суу өткөрүүчү түтүк тартылды.
– Түтүктөрдүн жалпы узундугу 4,8 чакырымды түзөт.
Бүгүнкү күндө биринчи линиянын курулушу толугу менен аяктап, шаар тургундарына үзгүлтүксүз таза суу берүү үчүн пайдаланууга берилди. Алдыда долбоордун 2-линиясын куруу пландалууда.
