Бүгүн 2-ноябрда, Ош шаарынын мэриясында Кыргыз Республикасынын “Туризм жөнүндө” мыйзамынын жаңы редакциясынын долбоорун талкуулоого арналган тегерек стол өттү.
Иш-чара Кыргыз Республикасынын Министрлер Кабинетине караштуу Туризмди өнүктүрүү боюнча мамлекеттик агенттиги тарабынан Азия өнүктүрүү банкынын колдоосу менен уюштурулду.
Талкуунун жүрүшүндө мыйзам долбоорунун негизги жоболору тааныштырылып, туризм тармагын өнүктүрүү, туристтик кызмат көрсөтүүлөрдүн сапатын жогорулатуу жана тармактагы ишкердик үчүн жагымдуу шарттарды түзүү маселелери каралды.
Жыйынга жергиликтүү өз алдынча башкаруу органдарынын, туристтик ишканалардын, тармактык бирикмелердин өкүлдөрү, эксперттер жана жергиликтүү жамааттардын өкүлдөрү катышып, мыйзам долбоорун өркүндөтүү боюнча өз сунуш-пикирлерин билдиришти.
Белгилей кетсек, мыйзамдын жаңы редакциясын иштеп чыгуунун максаты — туризм тармагындагы укуктук базаны өркүндөтүү жана өлкөдө туризмдин туруктуу өнүгүшүнө өбөлгө түзүү болуп саналат.
