🔹Ош шаарында VI Дүйнөлүк Көчмөндөр оюндарына карата даярдыктардын бир бөлүгү катары “Биримдик кербени” аттуу ири регионалдык маданий долбоор башталды. Бул эстафета суунун кыргыз эли үчүн өзгөчө маанисин баса белгилеп, өлкөнүн биримдигин чыңдоону, салт-санааны даңазалоону жана аймактардын маданий мурасын таанытууну көздөйт.

🔹Суу — көчмөн цивилизациясында тазалыктын, жаңылануунун жана муундардын улантылышынын символу. Ушул терең маани VI Дүйнөлүк Көчмөндөр оюндарында биримдиктин башкы белгиси катары колдонулат. “Биримдик кербени” өлкөнүн бардык аймактарын камтып, ар бирине өзүнүн маданий өзгөчөлүгүн жана руханий мурасын көрсөтүүгө жол ачат.

🔹Долбоордун негизги этаптары

1. Региондордо тандоо иш-чаралары (2025-жылдын 31-декабрына чейин)

• Республиканын бардык облустарында жана Бишкек шаарында атайын маданий жана коомдук иш-чаралар уюштурулуп, алардын жыйынтыгында төмөнкүлөр аныкталат:
• Региондук Баатырлар — улуттук спортту өнүктүрүүгө салым кошкон спортчулар;
• Региондун Элчилери — өз аймагынын өнүгүшүнө зор эмгек сиңирген кадырлуу инсандар;
• Аймак үчүн маанилүү суу булагы — тарыхый, жаратылыштык же маданий мааниге ээ булак же суу объектиси.

2. Көөкөргө суу куюу аземи.

Ар бир аймакта тандалган булагынан алынган суу салтанаттуу түрдө көөкөргө куюлат. Андан кийин Баатыр менен Элчи көөкөрдү кербен коштоосунда борбордук аянтка жеткирип, Ош шаардык мэриясынын өкүлдөрү катышкан “Сууну даңазалоо” аземине тапшырат.

3. Көөкөрдү “Сулайман-Тоо” музей комплекси жайгашкан ачык аянтка коюу.

Аземден соң көөкөр музейдин атайын аянтчасына орнотулуп, шаар тургундары жана коноктор үчүн ачык экспозиция катары көрсөтүлөт.

4. Региондордун көөкөрлөрүн Бишкек шаарына жеткирүү (2026-жылдын 5-15-августу).

Бул аралыкта өлкөнүн бардык аймактарынан топтолгон көөкөрлөр борборго алынып келинип, VI Көчмөндөр оюндарынын ачылышына чейин Башкы суу сактагычта жайгаштырылат. Экспозиция бардык каалоочулар үчүн ачык болот.

5. VI Дүйнөлүк Көчмөндөр оюндарын ачуу аземи (2026-жылдын 31-августу).

🔹Башкы Баатырдын, региондордун баатырларынын жана элчилеринин катышуусундагы Улуу кербен “Бишкек-Арена” стадионуна көөкөрлөрдү алып чыгат.

🔹Ачылыш аземинде:
Бардык аймактардын суулары, мурунку оюндардын символу болгон казак Торсыгындагы суу жана бул оюндарга катышкан өлкөлөр алып келген суулар бирдиктүү идишке куюлуп, көчмөн элдердин достугун, ынтымагын жана биримдигин чагылдырган улуу символ жаратылат.