Таңкы рейддин алкагында шаар мэри Жеңишбек Токторбаев Манас-Ата аймактык башкармалыгында жайгашкан Ош шаардык №2 үй-бүлөлүк медицина борборунун, №2 Үй-бүлөлүк дарыгерлер тобунун (поликлиника) имаратынын абалы менен таанышты. Аталган медицина борбору (поликлиника) көп кабаттуу турак үйдүн биринчи кабатында жайгашканы жана ушул убакка чейин капиталдык оңдоодон өтпөгөнү маалым болду. Шаар мэри имаратты толук капиталдык оңдоодон өткөрүү зарылдыгын баса белгиледи. Ошондой эле имараттын аймагында жайгашкан мыйзамсыз курулуштарды алып салуу боюнча тиешелүү тапшырмалар берилди. Кыдыруу учурунда көп кабаттуу үйдүн жашоочулары да мэрге кайрылып, өз арыз-даттанууларын билдиришти. Шаар башчысы жашоочулардын кайрылууларын угуп, биринчи кезекте өздөрүнө тиешелүү аймакты оңдоп-түзөө зарылдыгын белгиледи.
