Ош шаарынын мэри Жанарбек Акаев Төлөйкөн айылында жайгашкан санаторийде жүргүзүлүп жаткан оңдоп-түзөө иштеринин жүрүшү менен жеринде таанышты. Калаа башчысы тиешелүү кызматтарга жана жооптуу жетекчилерге курулуш иштерин сапаттуу жүргүзүп, белгиленген мөөнөттө жана талапка ылайык бүтүрүү боюнча конкреттүү тапшырмаларды берди. Мэр мындай объектилерди жаңылоо шаар тургундарынын жана келген коноктордун ден соолугун чыңдоого, ошондой эле эс алуу шарттарын жакшыртууга өбөлгө болоорун белгиледи. Санаторийдин имараты 4 кабаттан туруп, жалпы аянты 3300 м² түзөт. Курулуш иштери 2025-жылдын сентябрь айында башталган. Учурда иштердин 70 пайызы аяктады. Имараттын чатыры толугу менен алмаштырылып, ичи-тышы шыбалып, жаңы эшик-терезелер орнотулууда. Ошондой эле жылуулук, электр жана өрт коопсуздук системалары жаңыланып, долбоорго ылайык эмеректер менен жабдылып, имаратка лифт орнотулат.
