Ош шаарында милициянын кайгуул кызмат бөлүмү тарабынан “Коопсуз кадам – жаркын келечек” аттуу форум өттү. Форумга шаар мэри Жанарбек Акаев, шаардык кеңештин төрагасы Болот Баетов, шаардык ички иштер башкармалыгынын башчысы, окучуулар жана ата-энелер катышты.
Шаар башчысы өнүккөн өлкөлөрдө жол кырсыгынан каза болгон балдардын өлүмү чоң трагедия катары кабыл алынарын белгилеп, бизде мындай учурлар көбүнчө жөн гана статистика катары каралып калып жатканын баса белгиледи.Мэр ар бир бала – биздин келечегибиз экенин айтып, алардын коопсуздугуна кайдыгер карабоо ар бир жарандын милдети экенине токтолду. Ошондой эле жол кырсыктарынын алдын алуу иштерин тынымсыз жана системалуу жүргүзүү зарылдыгын белгилеп, айдоочуларды жана жаштарды жол коопсуздук эрежелерин так сактоого чакырды. Форумдун жүрүшүндө жол коопсуздугу темасында театрлаштырылган сахналык көрүнүш уюштурулуп, анда жол эрежелерин сактоонун мааниси жана коопсуз жүрүүнүн негизги талаптары чагылдырылды. Аталган иш-чара аркылуу айдоочулар менен жөө жүргүнчүлөрдүн жоопкерчилиги, жол кырсыктарынын алдын алуу, балдардын коопсуздугу сыяктуу маанилүү маселелер көтөрүлүп, катышуучуларга таасирдүү жеткирилди.
