Ош шаарынын мэриясынын биринчи кварталдын жыйынтыгы боюнча кезектеги коллегиялык жыйыны өткөрүлдү. Жыйынга Ош шаарынын мэри Жанарбек Акаев, шаардык кеңештин төрагасы Болот Баетов, коллегиянын мүчөлөрү, шаар башчысынын орун басарлары, мамлекеттик жана муниципалдык мекеме-ишканалардын жетекчилери катышты.

Күн тартибинде үч негизги маселе каралды:

– Кыргыз Республикасынын “Укук бузуулардын алдын алуунун негиздери жөнүндө” Мыйзамынын алкагында коомдук коопсуздукту камсыздоо жана кылмыштуулуктун алдын алуу боюнча жүргүзүлүп жаткан иштер;

– Ош шаарында жол кыймылынын коопсуздугун камсыздоо маселелери;

– Кыргыз Республикасынын “Майыптыгы бар адамдардын укуктары жана кепилдиктери жөнүндө” Мыйзамынын жана “Жеткиликтүү өлкө” мамлекеттик программасынын аткарылышынын абалы.

Калаа башчысы шаар тургундарынын коопсуздугу биринчи орунда экенин белгилеп, көзөмөл камераларын сатып алууда каражатты үнөмдөбөстөн, жетиштүү деңгээлде камсыздоо зарылдыгын айтты. Көзөмөл системаларын кеңейтүү коопсуздукту жогорулатып, кылмыштуулукту азайтууга өбөлгө түзөрүн билдирди.

Ошондой эле шаар мэри майыптыгы бар адамдардын укуктарын коргоо, жашоо шарттарын жакшыртуу, инфратүзүмгө жеткиликтүүлүктү камсыздоо жана реабилитациялык кызматтарды өнүктүрүү зарылдыгын белгиледи.

Жыйындын соңунда шаар мэри күн тартибиндеги үч маселе боюнча тиешелүү кызматтарга ыкчам жана жоопкерчиликтүү иш алып барууну тапшырды. Көтөрүлгөн көйгөйлөрдү чечүү, кемчиликтерди жоюу жана ишти натыйжалуу жүргүзүү боюнча тиешелүү токтомдор кабыл алынды.