Ош шаары, 9-май
Улуу Жеңиштин 81 жылдыгы Ош шаарында салтка айланган «Өлбөс полк» жүрүшү менен башталды. Эрте менен шаардын негизги Алымбек Датка көчөсүн бойлой Борбордук аянтка чейин миңге чукул калаа тургуну чогулуп, Улуу Ата Мекендик согушка катышкан чоң аталарынын, жакындарынын сүрөттөрүн көтөрүштү. Жүрүшкө Ош шаарынын мэри Жанарбек Акаев, шаардык кеңештин төрагасы Болот Баетов, Президенттин Ош облусундагы ыйгарым укуктуу өкүлүнүн биринчи орун басары Мирлан Орозалиев, Россия Федерациясынын Ош шаарындагы башкы консулу Роман Свистин да катышты. Мэр жүрүшкө Советтер Союзунун баатыры Чолпонбай Түлөбердиевдин сүрөтүн көтөрүп чыкты.Жүрүштөн соң өчпөс отко гүлчамбар коюлуп, эскерүү иш-чарасы өттү.”Ата-бабаларыбыздын эрдиги эч качан унутулбайт. Биз аларды ар дайым сыймыктануу менен айтабыз. Азыркы бейпил жашоону алар бизге кан менен, жан менен алып беришкен», – деди шаар башчысы. Мэр өз сөзүндө азыркы учурда да дүйнөдө согуштар көп болуп жатканын белгилеп, Кыргызстанда стабилдүүлүк, ынтымак жана тынчтык түбөлүк өкүм сүрүшүн каалады.”Биздин милдет – ошол баатырлардын эрдигине татыктуу болуу. Ош шаары мындан ары да гүлдөп, жаратман долбоорлор ишке аша берсин. Башкысы – элибиз тынч болсун”– деп кошумчалады Жанарбек Акаев.Иш-чаранын соңунда калаа тургундарына майрамдык маанай тартууланып, концерт уюштурулду.
