Кыргыз Республикасынын Курулуш, архитектура жана турак жай-коммуналдык чарба министри Нурдан Орунтаев бүгүн “100 өнөр жай ишканасы – 2026” тизмесине кирген инвестициялык долбоорлорду ишке ашырып жаткан ишкерлер менен жумушчу жолугушуу өткөрдү.
Жолугушууга Ош шаарынын мэринин биринчи орун басары Оморбек Торобаев, мамлекеттик органдардын өкүлдөрү жана ишканалардын жетекчилери катышышты.
Талкуунун жүрүшүндө долбоорлордун учурдагы абалы, ишке киргизүү мөөнөттөрү жана аларды ишке ашыруудагы көйгөйлүү маселелер каралды.
“Кен Строй Сервис”, “Куньлунь”, “Папан Бөрү”, “Барбол кондитердик фабрикасы”, “Обидфайз”, “Эко Азык” жана “Азия Органикс” ишканаларынын долбоорлору боюнча курулуш иштеринин жүрүшү, уруксат документтери, жер жана инженердик инфраструктура маселелери талкууланды.
Соңунда аныкталган көйгөйлөрдү ыкчам чечүү жана долбоорлорду белгиленген мөөнөттөрдө ишке киргизүүнү камсыз кылуу боюнча тиешелүү мамлекеттик органдарга тапшырмалар берилди.
