Бүгүн, Ош шаарынын мэриясынын социалдык өнүктүрүү бөлүмүнүн башчысы Нурлан Закиров Япониянын Эл аралык кызматташтык агенттигинин (мындан ары JICA) өкүлү Мория Масахиро менен жолугушту.
Жолугушууда тараптар Япония Эл аралык Кызматташтык Агенттигинин колдоосу менен Ош шаарындагы мектептерде илимий изилдөөлөрдү жүргүзүү жана долбоордун алкагында кызматташуу боюнча талкуулашты.
Жолугушуунун соңунда жогоруда аталган долбоорду ишке ашырууга Ош шаарынын мэриясы тарабынан колдоо көрсөтүлөрү айтылып, математика сабагы боюнча мугалимдеринин билимин жогорулатууга багытталган семинарларды өткөрүү, окуучулардын дараметин аныктоо үчүн япониялык изилдөө тобунун мүчөлөрү тарабынан сабактарга байкоо жүргүзүү боюнча макулдашылды.
Изилдөөнүн максаты – Ош шаарындагы 5 мектептин башталгыч класстарынын окуучуларынын билим деңгээлин текшерүү, мүмкүнчүлүгүн баалоо болуп саналат.
Изилдөө башталгыч класстын окуучуларынын логикалык ой жүгүртүүсүн жогорулатууга, мугалимдерге математика боюнча жаңы ыкмаларды үйрөнүүгө мүмкүнчүлүк берет.
