Бүгүн, Ош шаарынын мэринин биринчи орун басары Марс Исаев Индия Республикасынын Кыргыз Республикасындагы элчилигинин экинчи катчысы Ражни Верма менен жолугушту.
Жолугушууда тараптар 21-июнь күнү Ош шаарында Эл аралык йога күнүн өткөрүү маселесин талкуулашты. Жолугушуунун жүрүшүндө Марс Исаев Ражни Вермага ыраазычылык билдирип, буга чейин Ош шаарында эл аралык йога күнүн белгилөө салтка айланганын, бул иш-чараны өткөрүүгө Ош шаарынын мэриясы ар тараптуу көмөк көрсөтөөрүн баса белгиледи.
Ражни Верма Ош шаарынын жана Бишкек шаарынын мэриясы Индия тарап менен көптөн бери өнөктөш болуп келгендигин жана кызматташтык жемиштүү өнүгүп жатканын белгилеп, алдыдагы иш-чараларды өткөрүүдө ийгиликтерди каалады.
Мындан тышкары, жолугушуунун жүрүшүндө эки тараптуу кызматташууну өнүктүрүү, анын ичинде санариптик технологияларды киргизүү жаатындагы маселелер талкууланды.
Учурда Ош шаарынын борбордук стадионунда оңдоп-түзөө иштери жүрүп жаткандыктан, Эл аралык йога күнүн «Алай» футбол академиясынын машыгуу аянтчасында өткөрүү сунушталды.
