12-май, Ош шаары
Бүгүн терроризмге каршы күрөштө кызматтык милдетин аткарууда каза болгон укук коргоо органдарынын кызматкерлеринин элесине арналган эскерүү митинги өттү.
Иш-чарага Ош шаардык мэриясынын өкүлдөрү, Ош шаардык кеңешинин депутаттары, аскердик жана күч түзүмдөрүнүн өкүлдөрү катышты. Мындан тышкары, шаар тургундары, маркумдардын туугандары жана мектеп окуучулары да эскерүү иш-чарасына күбө болушту.Эскерүү митингдин жүрүшүндө кызматтык милдетин аткарууда курман болгон кызматкерлердин элесине таазим көрсөтүлүп, мемориалга гүл коюу аземи өткөрүлдү. Ошондой эле маркумдардын арбагына багышталып куран окулуп, дуба кылынды.
Эскерүү иш-чарасынын негизги максаты — Мекенибиздин коопсуздугу жана элдин тынчтыгы үчүн өз өмүрүн арнаган кызматкерлердин эрдигин даңазалоо, алардын жаркын элесин түбөлүк сактоо жана жаш муундарды мекенчилдикке тарбиялоо болуп саналат.
Белгилей кетсек, мындай иш-чара Ош шаарында быйыл экинчи ирет өткөрүлүп жатат.
Соңунда шаардык дене тарбия жана спорт комитети тарабынан уюштурулган күч түзүмдөрүнүн ардагерлери жана учурдагы кызматкерлеринин командалары арасында өткөн волейбол жана футбол боюнча мелдештердин жеңүүчүлөрүнө ардак грамоталар, медалдар, кубоктор жана баалуу сыйлыктар тапшырылды.
