Бүгүн, Бабур атындагы театрда КР “Аялдар кеңеши” коомдук бирикмесинин 100 жылдыгына карата “Аялдар коомдо зор күч” аталышындагы иш-чара өтүп, ага Ош шаарынын мэриясынын, шаардык кеңешинин өкүлдөрү, КР Аялдар кеңешинин төрайымы Айнуру Алтыбаева, КР “Аялдар кеңеши” коомдук бирикмесинин Ош шаарындагы Аялдар кеңешинин төрайымы Атыргүл Кожоева, билим берүү жана медицина тармагынын өкүлдөрү катышты.
Иш-чаранын жүрүшүндө Кыргыз чыгаан аялдарын чагылдырган сахналаштырылган көрүнүш, Маданият башкармалыгы тарабынан даярдалган концерттик программа тартууланып, улуттук колориттеги көргөзмө уюштурулду.
Ошондой эле, аялдардын коомдогу орду тууралуу баяндама айтылып, коомдук иштерге активдүү катышкан, көрүнүктүү иштерди алып барган айымдар сыйланды.
Иш-чара аялдардын Кыргыз мамлекеттүүлүгүнүн түптөлүшүнө кошкон өзгөчө салымын чагылдырып, алардын кадыр-баркын жогорулатып, өлкөнүн жаңылануу багытындагы өнүгүү процесстерине активдүү катышуусун колдоо менен бирге жаштарды тарбиялоо жоопкерчилигин күчөтүп, аларга туура багыт берүү максатында өткөрүлдү.