Бүгүн Ош шаарындагы «Meery Garden» эс алуу багында жалпы республикалык тестирлөөдө (ЖРТ) жогорку көрсөткүчтөргө жетишкен окуучуларды сыйлоо аземи өттү.
Салтанаттуу иш-чарага Ош шаарынын мэри Жанарбек Акаев катышып, билим сынагында мыкты жыйынтык көрсөткөн бүтүрүүчүлөрдү жеңиши менен куттуктады. Шаар башчысы жаштарга ийгилик каалап, алардын жетишкендиктери талыкпаган эмгектин, тынымсыз изденүүнүн жана максатка умтулуунун жемиши экенин билдирди.
Шаар башчысы 210 баллдан жогорку упай топтогон окуучуларга Ош шаарынын мэриясынын атынан акчалай сыйлыктар менен белекке ноутбуктарды тапшырды.
Белгилей кетсек, 2025-2026-окуу жылынын жыйынтыгы боюнча Ош шаарынан ЖРТда 1 “Алтын сертификат” ээси аныкталып, дагы 1 бүтүрүүчү эң жогорку упайга ээ болгон. Бул жетишкендиктер – Ош шаарынын жаштарынын билимге болгон умтулуусунун жана алдыга койгон бийик максаттарынын жаркын көрсөткүчү.
