Ош шаарынын мэри Жанарбек Акаев жана Курулуш, архитектура жана турак жай-коммуналдык чарба министри Нурдан Орунтаев Ош шаарында курулуш иштерин жүргүзүп жаткан подрядчы ишкерлер менен жолугушту. Жыйынга тиешелүү мекеме-ишканалардын жетекчилери жана курулуш компанияларынын өкүлдөрү катышты.
Жолугушууда министр курулуш тармагындагы механизмдер жана иштерди мыйзамдуу жүргүзүү тартиби тууралуу маалымат берди. Ошондой эле Ош шаарындагы айрым курулуш объекттери тиешелүү документтери жок, мыйзамсыз башталганын белгилеп, учурда мындай 34 объект бар экенин айтты. Министр бул маселе олуттуу көйгөй экенин белгилеп, аткарылган иштердин сапаты жана мыйзамдуулугу тиешелүү тартипте каралып чыгып, өлкө башчысынын көзөмөлүндө бир чечим кабыл алына турганын билдирди. Шаар мэри азыркы учурда тиешелүү мамлекеттик органдар тарабынан жүргүзүлүп жаткан текшерүү иштери жыйынтыкталгандан кийин тиешелүү чечимдер кабыл алынарын айтты. Жыйындан соң министр шаар мэри менен биргеликте Гапар Айтиев жана Көкүм-Бий көчөлөрүн байланыштыруучу эки деңгээлдүү көпүрөнүн, Кең-Сай массивинде салынып баштаган мектеп жана бала бакчанын, Мамлекеттик ипотекалык компаниянын турак жай имараттарынын курулуш иштери менен жеринен таанышты.
