Ош шаарында мэр Жанарбек Акаевдин катышуусунда чет элдик ишкерлерге карата рейд жүргүзүлүп, Кыргыз Республикасынын мамлекеттик тил жөнүндө мыйзамынын талаптарынын аткарылышы текшерилди.
Рейддин жүрүшүндө мамлекеттик тил жөнүндө мыйзамдын талаптарына жооп бербеген жарнамалык такталар жана маалыматтык жазуулар аныкталып, айрым ишкерлерге аларды мыйзам талаптарына ылайык келтирүү үчүн бир саат убакыт берилди.
Жанарбек Акаев ишкерлерди коомдук тартипти сактоого жана Кыргыз Республикасынын мыйзамдарын так аткарууга чакырды.
“Шаар бийлиги мыйзам чегинде иш алып барган ар бир ишкерди колдойт. Бирок сиздер дагы Кыргыз Республикасынын мыйзамдарын так сактап, мамлекеттик тил жөнүндө мыйзамдын талаптарын сөзсүз аткарышыңыздар керек”, – деди мэр.
Мындай рейддер мыйзам бузуулардын алдын алуу, мамлекеттик тил жөнүндө мыйзамдын талаптарынын аткарылышын камсыздоо жана шаардагы тартипти чыңдоо максатында мындан ары да улантылат.
