А.Сүйүмбаев атындагы борбордук стадиондо Кыргызстандын тарыхында алгачкы жолу, “Спорт баары үчүн!” ураан алдында өзгөчөлүгү бар балдар арасында жеңил атлетика боюнча эл аралык чемпионатына бүгүн старт берилди.

Чемпионаттын ачылыш аземине Ош шаарынын мэринин орун басары Замир Юсупов, КР Жогорку Кеңешинин депутаты Нуржигит Кадырбеков, Түркиянын TOSSFED атайын спортчулардын спорт федерациясынын президенти Бирол Айдын Мырза, «Сантерра-Юг» Даун синдрому менен ооруган балдардын ата-энелери» коомдук кайрымдуулук фондунун жетекчиси Жылдыз Туратбекова катышышты.

Мелдештерге жалпы Кыргызстандын аймактарынан, Өзбекстан, Казакстан, Түркия өлкөлөрүнөн келген Даун синдрому, аутизм жана башка менталдык жактан өзгөчөлүгү бар 200гө жакын балдар катышып, алар эки күндүн ичинде категорияларга ылайык, бекитилген аралыкта чуркашат.

Жеңүүчүлөр Ош шаардык дене тарбия жана спорт комитети тарабынан медалдар, дипломдор жана демөөрчүлөрдүн баалуу сыйлыктары менен сыйланышат.

Белгилей кетсек, аталган спорттук иш-чара Ош шаарынын мэриясынын колдоосу менен Кыргызстан атайын спортчулардын федерациясы (КАСФЕД) тарабынан уюштурулду.