Бүгүн, 1-июнь – Балдарды коргоонун эл аралык күнүнө карата Ош шаарындагы майрамдык иш-чаралардын алкагында Токтогул Сатылганов атындагы эс алуу багында «Келечек» балдардын чыгармачылык борбору тарабынан даярдалган концерттик программа тартууланып, балдар үчүн чыгармачылык мастер-класстар, сүрөт көргөзмөсү көрсөтүлдү.
Ошондой эле, балдардын асфальтка сүрөт тартуу сынагы, Ош шаардык дене тарбия жана спорт комитети тарабынан кыска аралыкка чуркоо, аркан тартыш, шахмат, тогуз коргоол, армрестлинг боюнча мелдештер өткөрүлдү.
Асфальтка сүрөт тартуу боюнча сынактын жана мелдештердин жеңүүчүлөрү баалуу сыйлыктар жана белектер менен сыйланышты.
Мындан тышкары, Ош шаарынын мэриясынын кызматкерлери Ош шаардык балдарды жана үй-бүлөнү реабилитациялоо боюнча адистештирилген борборунда, Ош облустар аралык балдар ооруканасынын онкология бөлүмүндө дарыланып жаткан балдардан кабар алышып, Ош шаарынын мэриясы тарабынан акчалай жардамдар жана белектер тапшырылды.
