Бүгүн, Ош шаарындагы №20 И.Раззаков атындагы мектеп-гимназиясынын жаңы имаратынын ачылышы болуп өттү.
Мектептин ачылыш аземине Кыргыз Республикасынын Президенти Садыр Жапаров, Ош шаарынын мэри Бакытбек Жетигенов, билим берүү жана илим министри Догдургүл Кендирбаева, Архитектура, курулуш жана турак жай-коммуналдык чарба мамлекеттик агенттигинин директору Нурдан Орунтаев катышышты.
Белгилей кетсек, Раззаков мектеби менен катар жалпы өлкө боюнча курулушу аяктаган 9 мектептин, 2 бала бакчанын онлайн ачылышы болду.
Аянты 709 чарчы метрди түзгөн жаңы мектеп үч кабаттан туруп, 720 окуучуга ылайыкташкан. Имарат республикалык бюджеттин эсебинен заманбап талаптарга ылайык курулган. Мында окуучулар үчүн бардык зарыл болгон шарттар түзүлүп, акыркы үлгүдөгү лабораториялык, стоматологиялык бөлмөлөр, спорттун ар кандай түрлөрүнө ыңгайлашкан аянтчалар каралган.
Эске салсак, билим берүү мекемесинин пайдубалы 2013-жылы түптөлүп, бирок каражаттын тартыштыгынан курулуш иштери токтоп калган. Керектүү каражат 2022-жылы бөлүнгөндөн кийин жумуштар кайрадан жанданган.
