ОшМУнун бизнес жана менеджмент факультетинде бүгүн, 5-июлда, Ош шаарынын мэринин кубогуна арналган тогуз коргоол боюнча эл аралык мелдеш башталды. Мелдешке 190дон ашуун Кыргызстандын жана жакынкы коңшу өлкөлөрдүн спортчулары катышууда.
Турнирдин ачылышына Ош шаарынын мэринин орун басары Нурбек Кадыров катышып, эл аралык мелдешти жыл сайын өткөрүү салтка айланып, мэрдин кубогу барган сайын жаштарды шыктандырып жатканын, спорттун улуттук оюндарынын түрлөрүн жайылтуу жана даңазалоо элдин жашоо турмушунда эң маанилүү аспектеринин бири экенин баса белгиледи.
Тогуз коргоол боюнча турнир Ош шаардык дене тарбия жана спорт комитети тарабынан уюштурулуп, 7-июлга чейин уланат. Жеңүүчүлөр кубок, медалдар, дипломдор жана баалуу белектер менен сыйланышат.
