Ош шаарынын мэринин орун басары Шумкарбек Пайзиев жана мэриянын аппарат жетекчиси Мыктыбек Осмоналиев Испаниянын Universidad Europea del Atlántico университетинин өкүлдөрүн кабыл алышты.
Жолугушууда университеттин өкүлдөрү Ош шаарында окуу жайдын филиалын ачуу жана кампус куруу демилгесин сунуштап, долбоорду ишке ашыруу үчүн жер тилкесин бөлүп берүү өтүнүчүн билдиришти.
Өз кезегинде мэрия демилгени колдой турганын билдирип, ылайыктуу жер тилкелеринин мүмкүн болгон варианттарын сунуштоого даяр экенин белгиледи.
Долбоорду ишке ашыруу шаарга чет элдик инвестицияларды тартууга, эл аралык кызматташтыкты өнүктүрүүгө жана Ош шаарынын, ошондой эле коңшу аймактардын жаштары үчүн жогорку билим алуу мүмкүнчүлүктөрүн кеңейтүүгө өбөлгө түзөт.
Маалыматка ылайык, учурда университет Кыргызстанда кампус ачуу үчүн Ош, Бишкек шаарларын жана Ысык-Көл аймагын караштырууда.
Жолугушуунун жыйынтыгында тараптар долбоорду ишке ашыруу боюнча иштерди жакынкы аралыкта баштоо ниетин билдиришти.

