Бүгүн, Ош шаарынын мэри Жанарбек Акаев “Алымбек датка” муниципалдык аймактык башкармалыгынын тургундары менен жолугушуу өткөрдү. Анда шаар башчы жергиликтүү элдин суроолоруна жооп берип, актуалдуу маселелер боюнча тиешелүү жетекчилерге тапшырмаларды берди.

Көтөрүлгөн негизги маселелер:

Тургундар тарабынан тротуарларды куруу боюнча суроо берилди. Мэр Жанарбек Акаев бул маселени жеринде карап, Жолдор башкармалыгына тиешелүү тапшырмаларды берди. Ошондой эле Абжалов көчөсүндөгү канализация маселеси каралып, чечүү жолдору талкууланды.

Ошондой эле тургундар Токтогул атындагы мектебине кошумча корпус куруу, балдардын жолдо жүрүү, жайкы сезонго карата каналдардагы коопсуздугун күчөтүү чараларын суранышты. Мэр шаардагы мектептердеги жүктөмдү азайтуу максатында учурда 17 жаңы мектеп курулуп жатканын билдирди.

Жаңы муниципалдык базарга каттаган маршруттук каттамдардын санын көбөйтүү боюнча сунуш түштү. Бул маселе да каралып, маршруттук каттамдар жакынкы убакта көбөйтүлмөй болду.

Жолугушуунун жүрүшүндө мэр Жанарбек Акаев административдик-аймактык реформанын алкагында шаарга жаңы аймактар кошулгандан кийин таза суу жана чаң маселеси актуалдуу бойдон калып жатканын кошумчалады. Бул багытта системалуу иштер жүрүп жатканын айтты.

Маалымат үчүн:

Шаар мэринин эл менен жолугушуулары мындан ары да бардык муниципалдык аймактык башкармалыктарда улантылат.