С.Ибраимов атындагы Ош улуттук драма театрында медицина кызматкерлеринин кесиптик майрамына арналган майрамдык иш-чара болуп өттү.
Иш-чарага Ош шаарынын мэринин орун басары Нурбек Кадыров, КР Президентинин Ош облусундагы ыйгарым укуктуу өкүлүнүн орун басары Илияз Ташбаев, Ош шаардык Кеңешинин төрагасынын орун басары Шайырбек Нуранов, жеке медициналык мекемелер жана клиникалар ассоциациясынын жетекчиси Камчыбек Исабаев, Ош шаарынын жана Ош облусунун жеке медициналык мекемелеринин жетекчилери жана кызматкерлери катышты.
Иш-чаранын жүрүшүндө медицина тармагында өзгөчөлөнгөн кызматкерлерге Ош шаарынын мэриясынын, КР Президентинин Ош облусундагы ыйгарым укуктуу өкүлчүлүгүнүн, Ош шаардык Кеңешинин Ардак грамоталары жана ыраазычылык баракчалары тапшырылды.
Ошондой эле эстрада жылдыздарынын жана бий топторунун катышуусунда концерттик программа тартууланды.
Жеке медициналык мекемелер жана клиникалар ассоциациясына шаардагы 62 медициналык мекеме кирет, анда 2000ден ашуун медициналык кызматкерлер эмгектенишет.
Медицина кызматкерлеринин кесиптик майрамы жыл сайын июль айынын биринчи жекшембисинде белгиленет.
