Султан Ибраимов атындагы Ош улуттук драма театрынын 50 жылдыгына арналган салтанаттуу иш-чара болуп өттү.

Иш-чарага Кыргыз Республикасынын Маданият, маалымат, спорт жана жаштар саясаты министринин орун басары Марат Тагаев, Ош шаарынын мэриясынын социалдык өнүктүрүү бөлүмүнүн башчысы Нурлан Закиров, маданият ишмерлери, театрдын негиздөөчүлөрү, белгилүү актёрлор, республиканын бардык аймактарынан жана Анжиян театрынан келген театр өкүлдөрү, театр искусствосунун сүйүүчүлөрү катышты.

Иш-чаранын расмий бөлүгүндө белгилүү актёрлор кызыл килемден басып өтүшүп, сахнага чыгып, көрүүчүлөргө спектакль үзүндүлөрүнөн тартуулашты. Театрдын эмгек сиңирген артисттери ыраазычылык баракчалары жана Ардак грамота менен сыйланышты.

Ошондой эле, театрдын жамаатына Ош шаарынын мэриясынын атынан 150 миң сомдук акчалай сыйлык тапшырылды. Иш-чарада мындан сырткары аншлаг менен өткөн спектаклдердин жана белгилүү актёрлордун сүрөттөрүнөн турган фото-көргөзмө уюштурулду.

Белгилей кетсек, бүгүнкү күндө С.Ибраимов атындагы Ош улуттук драма театрында 146 адам эмгектенет, анын ичинен 42 чыгармачыл кызматкер, 15тен ашыгы кесиптик сыйлыктарга жана ар кандай наамдарга ээ.