Бүгүн, Ош шаардык статистика башкармалыгында Кыргыз Республикасынын мамлекеттик статистика кызматкерлеринин кесиптик майрамына карата салтанаттуу иш-чара болуп өттү.
Иш-чарага Ош шаарынын мэринин орун басары Замир Юсупов катышып, статистика тармагында эмгектенип келе жаткан кызматкерлердин, ардактуу ардагерлердин кесипкөйлүгүн белгилеп, кесиптик майрамы менен куттуктап, ак эмгеги менен өзгөчөлөнгөн кызматкерлерди Ардак грамоталар жана акчалай сыйлыктар менен сыйлады.
Белгилей кетсек, Кыргыз Республикасынын Статистика кызматкерлеринин кесиптик майрамы 1995-жылдан бери жыл сайын апрель айынын акыркы жекшембисинде белгиленип келет.
Быйыл бул тармакка 98 жыл толду. Статистика боюнча биринчи комитет 1926-жылдын 29-апрелинде түзүлүп, ага статистикалык маалыматтарды ар тараптуу иштеп чыгуу, ошондой эле ошол мезгилде ар кандай ведомстволордун жана мекемелердин курамына кирген статистикалык органдардын ишин координациялоо милдети жүктөлгөн.
