Ош шаарынын мэри Жанарбек Акаев бүгүн Төлөйкөн айылында канализация түтүктөрүн тартуу боюнча жүргүзүлүп жаткан иштердин жүрүшү менен жеринен таанышты.
Учурда “Саябан” жеке компаниясы тарабынан жалпы узундугу 2,5 чакырымды түзгөн канализация түтүктөрүн тартуу иштери аткарылууда. Түтүктөр Жолон Мамытов көчөсүнүн жогорку тарабынан Куренкеев көчөсүнө чейинки аралыкка тартылууда.
Бул долбоор Төлөйкөн айылындагы канализация маселесин чечүүгө багытталган. Аталган маселе буга чейин шаар башчысынын жергиликтүү тургундар менен болгон жолугушуусунда көтөрүлүп, калк үчүн маанилүү көйгөйлөрдүн бири катары белгиленген.
Долбоор мэрдин демилгеси менен шаарга колдоо көрсөтүү максатында ишкерлер тарабынан даярдалып, учурда аны ишке ашыруу боюнча тиешелүү иштер жүрүп жатат. Долбоор толугу менен аяктаганда, Төлөйкөн айылындагы 300гө жакын кожолук борборлоштурулган саркынды суу тутумуна кошулуу мүмкүнчүлүгүнө ээ болот.
Шаар башчысы аталган демилгенин тургундар үчүн өзгөчө зарылдыгын белгилеп, аны ишке ашырууга колдоо көрсөткөн ишкерлерге ыраазычылык билдирди.
