Ош шаарындагы «Алай» футбол клубу өлкө биринчилигинин алкагындагы үчүнчү беттешин өз майданында өткөрүп, Кара-Балта шаарындагы «Кыргыз Алтын» командасы менен күч сынашты. Беттешке Ош шаарынын мэри Жанарбек Акаев, шаардык кеңештин депутаттары жана көптөгөн күйөрмандар катышты. Оюндун алдында шаар башчысы сөз сүйлөп, «Алай» футбол клубу Ош шаарынын намысын коргоп келе жаткан команда экенин белгилеп, мэрия тарабынан клубга мындан ары да ар тараптуу колдоо көрсөтүлөрүн айтты. Ошондой эле шаарда футболду өнүктүрүү, жаш спортчуларды колдоо жана спорттук инфраструктураны жакшыртуу боюнча иштер улантыларын белгиледи. Сөзүнүн соңунда эки командага тең ийгилик каалап, футболчуларга таза жана кызыктуу оюн көрсөтүүнү каалады. Оюндун жүрүшүндө эки команданын күйөрмандары оюнчуларга активдүү дем берип турушту. Алгачкы голду 13-мүнөттө «Кыргыз Алтын» командасы киргизсе, «Алай» клубу 29-мүнөттө эсепти теңеди. Жыйынтыгында 95 мүнөткө созулган беттеште эки команда тең чабуулга басым жасап, кызыктуу оюн көрсөтүп, беттеш тең эсеп менен жыйынтыкталды.
