Бүгүн, 2024-жылдын 28-апрелине белгиленген Кыргыз Республикасынын Жогорку Кеңешинин депутаттарын мөөнөтүнөн мурда шайлоого даярдык көрүү жана өткөрүү боюнча штабдын жыйыны өттү.
Жыйынга Кыргыз Республикасынын Борбордук шайлоо комиссиясынын төрайымы Нуржан Шайлдабекова, Ош шаарынын мэриясынын аппарат жетекчиси Азатбек Кубатбек уулу, Борбордук шайлоо комиссиясынын Ош облусу жана Ош шаары боюнча мүчөсү Узарбек Жылкыбаев, аймактык шайлоо комиссияларынын өкүлдөрү катышты.
Жыйында шайлоочулардын шайлоо процессине катышуусу негизги артыкчылыктуу багыттардын бири экени, ошол эле учурда мамлекеттик кызматкерлер шайлоону өткөрүүгө кийлигишпөөсү керектиги баса белгиленди.
Ошондой эле шайлоону уюштуруу иштери боюнча маалымат берилип, шайлоо комиссияларына өз убагында жардам көрсөтүү, майыптыгы бар жарандар үчүн тийиштүү шарттарды түзүү, шайлоо учурунда мыйзам бузуулардын алдын алуу жана болтурбоо боюнча маселелер талкууланып, уюштуруу маселелери боюнча пикир алмашуу болду.
Белгилей кетсек, учурда Ош шаарындагы 55 шайлоо участкасында 125 миңден ашуун шайлоочу катталган. Маалым болгондой, №7 Ош бир мандаттуу шайлоо округу боюнча учурда 17 талапкер катталган. Кыргыз Республикасынын Жогорку Кеңешинин депутатын мөөнөтүнөн мурда шайлоо үстүбүздөгү жылдын 28-апрелине дайындалган.
