Бүгүн, 10-июнда Ош шаарында Кыргыз Республикасынын Президентине караштуу Инвестициялар боюнча улуттук агенттик тарабынан уюштурулган «Инвестициялык багыт: аймактардын мүмкүнчүлүктөрү жана туруктуу өнүгүү» аттуу семинар өттү. Семинарга Кыргыз Республикасынын Инвестициялар боюнча улуттук агенттигинин директору Равшанбек Сабиров, Ош шаарынын мэри Жанарбек Акаев, Кыргыз Республикасынын Президентинин Ош облусундагы ыйгарым укуктуу өкүлүнүн биринчи орун басары Мирланбек Орозбаев, жана Кыргыз Республикасынын Министрлер Кабинетине караштуу Бизнести өнүктүрүү жана инвестициялар боюнча кеңештин катчылыгынын жетекчиси катышты. Иш-чара инвестициялык кызматташууну өнүктүрүүгө, аймактык долбоорлорду колдоого, мамлекеттик органдар менен бизнес өкүлдөрүнүн өз ара байланышын кеңейтүүгө, ошондой эле инвестицияларды тартуу боюнча мамлекеттик саясатты түшүндүрүүгө багытталды. Катышуучулар мамлекеттик-жеке өнөктөштүк долбоорлорун ишке ашыруунун өзөктүү маселелерин, уруксат кагаздарын алууда бюрократиялык жол-жоболорду жөнөкөйлөтүү жолдорун талкуулашты. Панелдик талкууда ишкерлер инвесторлор туш болгон негизги көйгөйлөрдү ачык айтып, мамлекеттик органдардын өкүлдөрүнөн конкреттүү жоопторду алышты.
