Кыргызстанда 2026-жылдын 1-июлунан тартып жаңы мамлекеттик жөлөкпул — «Бала ырысы» киргизилди. Жөлөкпулдун өлчөмү ай сайын 1200 сомду түзөт жана бала төрөлгөн күндөн тартып 3 жашка чыкканга чейин бардык балдарга үй-бүлөнүн кирешесине карабастан төлөнөт.
Жөлөкпулду алуу үчүн балага жеке идентификациялык номер (ПИН) берилип, ал алуучу (ата-энеси) менен чогуу жашаган болушу керек. Эгер үй-бүлөдө эгиз же андан көп бала төрөлсө, төлөм ар бир балага өзүнчө дайындалат.
Арыз берүү процесси жөнөкөйлөштүрүлүп, жөлөкпулга арызды «Түндүк» мобилдик тиркемеси аркылуу электрондук түрдө тапшырууга мүмкүнчүлүк түзүлгөн. Талап кылынган маалыматтар ведомстволор аралык электрондук өз ара аракеттенүү аркылуу такталып, жарандардын кошумча документ чогултуусуна болгон муктаждык азайтылат.
Жарандарга маалыматтарынын актуалдуулугун өз убагында жаңыртып туруу сунушталат. Бул жөлөкпулду өз убагында жана тоскоолдуксуз алууга шарт түзөт.
