Ош шаарындагы “Эко Азык” соода-логистикалык борборунун саркынды суу түтүктөрү шаардык канализацияга туташтырылат. Долбоор Бүткүл Дүйнөлүк Банктын “Регионалдык экономикалык өнүктүрүү” программасынын алкагында ишке ашат. Бул үчүн Х.Каримов көчөсүндөгү борбордун саркынды суу системасы толук жаңыланат. Бул ишкананын экологиялык абалын жакшыртат жана шаардык тармакка туруктуу туташууну камсыз кылат. Долбоордун жалпы баасы 10 млн 852 миң сом. Анын 10 млн сому грант эсебинен, 852 миң сому ишкананын өз каражатынан каржыланат. Учурда даярдык иштери жүрүп жатат. Курулуш жакынкы күндөрдө башталат.
