Бүгүн, 3-июнда Ош шаарында Жаштар борборунун жаңы имаратынын салтанаттуу ачылыш аземи болуп өттү. Иш-чарага Ош шаарынын мэри Жанарбек Акаев, Ош шаардык кеңешинин төрагасы Болот Баетов, БУУнун Өнүктүрүү программасынын (ПРООН) өкүлдөрү, Россия Федерациясынын Оштогу Башкы консулу Роман Свистин, студенттер жана жаштар катышты.

Шаар мэри студенттерге шаар аймагында 13 жаңы сквердин курулушу жүрүп жатканын айтып, ОшМУнун, ОшТУнун жана ОшКУУнун архитектура жана дизайн багытында билим алып жаткан студенттер, үч скверди өздөрү долбоорлоп ишке ашырууга чакырды.

«Бул силер үчүн чоң практика жана баалуу тажрыйба болот. Демилге көтөрүп, шаардын өнүгүшүнө өз салымыңарды кошкула. Мэрия тарабынан бардык колдоо көрсөтүлөт», — деп билдирди.

Жаштар борбору Ош шаарынын мэриясынын демилгеси менен БУУӨПтүн өнөктөштүгүндө жана Россия Федерациясынын каржылык колдоосу аркылуу курулду. Үч кабаттуу имаратта тил үйрөтүү, робототехника, шахмат, кулинария курстары, лидерлик боюнча окуулар, ошондой эле заманбап конференц-зал иш алып барат. Мындан тышкары, «Арууке» бий ансамблинин ишмердүүлүгү да ушул борбордо улантылат.

Белгилей кетсек, аталган Жаштар борбору Ош шаарынын мэриясынын Маданият жана жаштар иштери боюнча башкармалыгынын алдында түзүлгөн.