Бүгүн Ош шаарынын мэринин орун басары Эрнис Толтоев жарандарды жеке маселелери боюнча кабыл алып, алардын кайрылууларын, сунуштарын жана өтүнүчтөрүн укту.
Кабыл алууга мэриянын түзүмдүк бөлүмдөрүнүн, муниципалдык мекеме-ишканалардын жана аймактык башкармалыктардын жетекчилери дагы катышты.
Жолугушууда шаар тургундары документтерди тариздөө, материалдык жардам алуу, жер тилкелерине байланышкан талаш-тартыштарды чечүү, ипотекалык шартта турак жай алуу, мыйзамсыз курулуштарга чара көрүү, шаардын четки аймактарын таза суу жана электр энергиясы менен камсыздоо жана башка коммуналдык маселелерди көтөрүштү.
Эрнис Толтоев ар бир кайрылууну кунт коюп угуп, тиешелүү маселелерди чечүү боюнча жооптуу кызматтардын жетекчилерине тапшырмаларды берди.
